العروة الثانية هو مصطلح اكيد مر عليكم اهوا ويا بذرة الست.
زراعة العروة الثانية ببساطة يعني الفترة الربيعية اللي ياية من اول ما يدفا الجو الى بداية الصيف، نقدر نزرع وااااايد محاصيل بهالفترة.
اما مباشرة خارجي او نشتلها داخل المنزل بمكان دافي علشان نسبق الموسم ونكسب وقت بداية فبراير ان شاء الله نقدر نزرع محاصيل الربيع.
واللي ما يبي يزرع داخلي يقدر يزرع البذور مباشرة خارجي هم عادي، لكن ينطر التربة شوي تدفى.
اذا التربة حرارتها بالليل تحت ال18 التبرعم يمكن ما يكون مضبوط 100٪ لهالنباتات المحبة للجو الدافي، فالتشتيل يختصر شوي وقت.
في حال القرعيات مثلاً اهما مو مثل الطماط والفلفل، نموهم سريع و اوراقهم واغصانهم كبيرة تترس المكان.
ف اذا بتشتلونهم حطوا هالشي في الحسبان.
اذا ييتو تختارون اصناف قرع ويقطين للعروة الثانية ابتعدوا عن الاصناف العملاقة والكبيرة اللي تحتاج موسم طويل، واختاروا الصغير اضمن لكم.
الكوسا لا تحاتونها سريعة و ما تحتاج تشتيل نهائياً.
المصدر: itallgrows - زراعة عضوية في حديقة المنزل